Mən bu yazımı vətənimiz Gürcüstandan kənarda yaşayan həmvətənlərimizə həsr etmək istəyirəm. Bunun nə qədər vacib olduğunu, onların həyatının digərləri üçün örnək olduğunu, həmçinin belə insanlarımızın qürur mənbəyi olduqları səbəbindən onlar haqqında yazmağa qərar verdim. Vətənimizin hüdudlarından kənarda yaşayan və az sayda olan dəyərli insanlarımızın fəaliyyətləri, onların keçdikləri həyat yolu zəngin və mənalı olmaqla bərabər çoxşaxəli və rəngarəngdir. Belə ziyalılarmızdan biri Qönçə Yusifova-Ağayevadır.

 

Qönçə Yusifova 1976-cı ildə Bolnisi bələdiyyəsinin Həsənxocalı (indiki Xidiskuri) kəndində ziyalı ailəsində anadan olub. O, Həsənxocalı kəndində böyümüş və həmin kənddə natamam orta təhsil almışdır. Orta təhsilini Daşlıqullar (indiki Muxrana) kəndində davam etdirmişdir. Məktəbi yüksək nəticələrlə bitirdikdən sonra ali təhsilini Azərbaycan Dövlət Xarici Dillər Universitetində davam etdirmişdir. Universitetə yüksək balla qəbul olan Qönçə müəllim gələcək ixtisas kimi germanistika fakültəsini seçmişdir. Qönçə müəllimin alman dilini seçməsi təsadüfi deyildir. Ona alman dilini sevdirən, bu dili uzun illər yüksək səviyyədə tədris edən anası Mərziyyə Rəhimova olmuşdur.

 

Mərziyyə müəllim Bolnisi bələdiyyəsinin az sayda olan, alman dilini gənclərə böyük sevgi və yüksək peşəkarlıqla tədris edən ziyalılarmızdandır. Mərziyyə müəllim Həsənxocalı və Daşlıqullar məktəblərində alman dilini tədris etdiyi dönəmlərdə Gürcüstan Təhsil Nazirliyi tərəfindən, eləcə də yerli səviyyədə çox sayda mükafatlara və diplomlara layiq görülmüşdür. O, pedaqoji fəaliyyəti dövründə minlərlə gəncin təlim və tərbiyəsi istiqamətində çalışmış, alman dilini gənclərə sevdirə bilmişdir. Yaşadığı bölgədə yerli əhalinin böyük sevgi və hörmətini qazanmış Mərziyyə müəllim sevilən və seçilən ziyalılarmızdandır. Onun yolunun davamçısı olan Qönçə müəllim ailə ənənəsini davam etdirərək mənsub olduğu ziyalı ailəsinin və onu sevən insanların qürur mənbəyi olmağı bacarmışdır.

 

Azərbaycan Dövlət Xarici Dillər Universitetini bitirdikdən sonra vətənə qayıdan Qönçə Yusifova vaxtı ilə təhsil aldığı Daşlıqullar orta məktəbində alman dili müəllimi kimi çalışmağa başlamışdır. Alman dilini peşəkar səviyyədə tədris edən Qönçə müəllim çox keçmədən öz ixtisası sahəsində yüksək dərəcəli müəllim adını almışdır.

 

Qönçə müəllim şagirdlərində alman dilinə böyük sevgi və maraq yaratmağa nail ola bilmişdir. Daşlıqullar orta məktəbində bir müddət çalışdıqdan sonra təhsilini davam etdirmək qərarına gələrək Almaniyaya getmiş və Avropanın nüfuzlu universitetlərindən olan RUB (Ruhr University Bochum) universitetinə qəbul olmuşdur. O, alman dilinin filologiyası ixtisası üzrə ikinci ali təhsil almışdır. Təhsilini başa vurduqdan sonra Almaniyada yaşayıb işləməyə qərar verərək pedaqoji fəaliyyətə başlamışdır.

 

Universiteti müvəffəqiyyətlə bitirən Qönçə müəllim peşəkar, savadlı kadr kimi artıq uzun illərdir ki, Almaniyada alman dilini tədris edir. O, məktəblərdə və dil kurslarında alman dilini mükəmməl və bütün səviyyələrdə tədris edir. Seçdiyi ixtisas sahəsində öz biliklərini və peşəkarlığını artırmaq, tədris metodikasını mükəmməlləşdirməkdən yorulmur. Məhz bu səbəbdən üçüncü ali təhsili alman dilinin tədrisi metodikası üzrə almışdır.

 

Müəllimlik fəaliyyəti ilə yanaşı yaşadığı əyalətdə andlı tərcüməçi kimi fəaliyyət göstərir. Pedaqoji fəaliyyəti dönəmlərində yaşayıb yaratdığı əyalətin dəyərli ziyalıları içərisində adı çəkilən Qönçə müəllim bizim fəxr etdiyimiz və qürur duyduğumuz ziyalıdır. Pedaqoji fəaliyyəti ilə yanaşı yaşadığı əyalətdə yaşayan və təhsil almaq istəyən gənclərimizə həmişə dəstək olmuşdur. Almaniyada yaşadığı uzun illər ərzində bir çox insana yardım göstərmiş, onlara mənəvi dəstək olmuşdur.

 

Qöncə müəllimin gözəl ailəsi və övladları var. Vətəndən uzaqlarda yaşamaqlarına baxmayaraq mənsub olduğu xalqın mənəvi dəyərlərini, milli mədəniyyətimizi, musiqimizi və ədəbiyyatımızı övladlarına aşılamış, onlara Azərbaycan və gürcü mədəniyyətini sevdirə bilmişdir. Dəyərli ziyalılarmızdan olan və doğulduğu Bolnisi bələdiyyəsində böyük hörmət və sevgi qazanmış Qönçə müəllim örnək olan şəxsiyyətlərdəndir.

 

Qönçə Yusifovaya iş fəaliyyətində və şəxsi həyatında uğurlar arzulayıram!

 

Leyla YUSİFOVA