Bu gün Qardabanidə “MER2” filminin təqdimatı keçirilib.

 

“Yeni Yol” xəbər verir ki, mərasimi filmin ssenari müəllifi və rejissoru Binəli İslamoğlu açaraq film haqqında məlumat verib, məqsəd və gələcək planlardan danışıb. Sonra 16 dəqiqəlik film nümayiş etdirilib.

 

Pandemiyaya görə təqdimat mərasiminə məhdud sayda insanlar dəvət olunub. Mərasimdə əsasən filmdə rol alan aktyorlar və onların yaxınları iştirak ediblər.

 

B.İslamoğlunun “Yeni Yol”a bildirdiyinə görə, uşaqlarda incəsənətə maraq yaratmaq üçün çalışıb ki, filmdə daha çox uşaq iştirak etsin.

 

““BEEZ FİLM” olaraq gələcəkdə daha çox uşaqlarla işləməyi nəzərdə tuturuq. Məqsədimiz uşaqları kinoya, teatra, rəssamlığa, incəsənətə, bir sözlə, sağlam addımlarla gələcəyə hazırlamaqdır. İnşallah ki, bu pandemiya tez bir zamanda bitər və biz “BEEZ FİLM” ailəsi olaraq daha çox işlər görərək sizlərin qarşınıza çıxarıq”, - deyə B.İslamoğlu “Yeni Yol”a bildirib.

 

Filmin nümayişindən sonra "GeoWlan" internet şirkətinin direktoru Habil Əliyev balaca aktyorlara həvəsləndirici hədiyyələr təqdim edib.

 

Qeyd edək ki, “MER1” filmi kimi “MER2” filmində də əsasən Qardabanidə mövcud olan problemlər öz əksini tapıb. Filmin ssenari müəllifi və rejissoru Tiflis Azərbaycan Dövlət Dram Teatrının keçmiş aktyoru Binəli İslamoğludur. Mer rolunun ifaçısı İslam Akifdir. Filmdə həmçinin Tiflis Azərbaycan Dövlət Dram Teatrının keçmiş aktyoru Azər Musaoğlu, Zəhra Akif, Flora Əliyeva, Rauf Mamedov, Eldar Əliyev, Necati Əliyev, Rasim Həsənov, Yavər Naibov, Ramil Əhmədov, Rafail Əhmədov və Araz Əliyev rol almışdır.

 

Filmə baxmaq üçün linkə daxil olun: